هذه القصيده بدع من الشاعر/ابوهمام اليسلمي العولقي يوجهها الى اخوه الشاعر/صقر العصار النسي الهلالي


ياصقر هل عصار كيف النسيين..يالله عساهم في نعيمه وخيره

نسابتي اهل الرتب والنياشيين..ذي صيتهم قد عم شبه الجزيره

في صفحة التاريخ حطوا عناوين..وسطروها باالخطوط الكبيره

لسلابهم تشهد جميع الميادين..لامساء وضلاء من نخرها عكيره

ماتقبل الباطل ولا باطل تعين..ولاتجي درب الشروع القصيره

ماهو مدح ماقلت واقع وله عين..تشهد لهم في كل وادي وديره

ماتنكر الاجواد الا الدنيين..اهل الشروع الناقصه والحقيره

ذي مالهم في الجود والعز حرفين..ولا لهم شي اسم يذكر وسيره

الجيد له عندي معزه وتامين..لو الدم ذي بيني وبينه بحيره

ذا فصل اول جاك والثاني الحين..جبته من اعماق البحور الغزيره

فيه الذهب والماس هو والبلاتين..مخصوص لك يابن القرون الجسيره

والثانيه ترحيب مليون وثنين..اهلا وسهلا عد دحقه وسيره

في المملكه نورت والنور نورين..نورت والليله علينا نويره

في ارض محكومه على منهج الدين..ماهي على دستور توني بليره

ولا على منهج نجادي وخامين..ذي خالف الشرع الالهي مسيره

وفصل ثالث هات علم الجنوبين..هت لي خبار ابين ولحج الخضيره

وحضرموت القلب والمهره العين..وشبوه التاريخ والأم صيره

هل شي امل بانقسم الارض قسمين..كلن يخذ قسمه مطيره مطيره

قالوا نهار الحسم يوم الثلاثين..ذي فيه صالح بايطلق سميره

وتعود لاعند اهلها والمحبين..تعيش حره بعد ماهي اسيره

ذي هي اسيره من سنة عام تسعين..في دايره متغفله مستديره

اكد لنا ياصقر شفنا بعيدين..ماذا مصير الحسم ماذا مصيره

هذا صدر لك والتحيات الفين..من راس بداع الجيوش العسيره

جيش الفناء ذي يقضي الدين باالدين..والسن باالسن والبصر باالبصيره

جيش العوالق ذي يزن الميازين..وله في التاريخ ما لا لغيره

هابتهم امريكا ولندن وبرلين..بجيوشها في رعب تمسي ذعيره

والختم عاالمختار صلوا ملايين..شفيعنا من نار حمراء سعيره

-----------------------------

هذه القصيده من كلمات/ صقر العصار.النسي وهي جواب على اخيه ألشاعر / رمزي اليسلمي العولقي ابوهمام:

يامرحبا ترحيب واهلا وسهلين.. عد النجوم الساريات ألمنيره

ترحيب يملا الحد الاقصى والادنين..مني ومن ربعي وكل العشيره

بالشاعر اللي جاب بالبيت بيتين..شاعر وله قيفان دايم مثيره

راسه صليب وجيد ربعه وفيين..زبن المجنا من تجنا يجيره

من نسل قومآ ف الشدايد مجانين..مايحسبوا الارباح ولا الخسيره

رمز آل يسلم يقسمواالصف صفين..لاثور الباروت وامست غتيره

واهله عوالق يدعسوا عالثعابين..والجيد من صابر وناطح صبيره

باميال حمراء من بطون المجازين..والخصم باترويه من سم بيره

ذا فصل والثاني جوابك على سين.. يومك تخبرني شف العين ثيره

تسأل على ربعي وكل النسيين..الخير واجد والمطر في حجيره

والوضع طيب يحمدوا الله حمدين.. حمد الرضاء في اليسر ولا العسيره

مايشتكوا من ضيم ولا معادين.. في سلمهم شوف ألكبيره صغيره

وان حد عطاهم صاع ردوه صاعين.. بالرمح ولا بالسيوف الشطيره

بوزيد شبره زاد عالناس شبرين.. نهار ضلى شد حشكه وشيره

واحنا قفا الاجداد ف الجود ماشين.. نمشي على نفس النسق والوتيره

والثانيه نا جيت في خط.عارين. لا المملكه والطيب ينفح عبيره

دربي ودربك درب ماهوب دربين.. بانلتقي في حر او زمهريره

صداقتك مكسب في العسر وأللين.. ماهي صداقة لاجل درهم وليره

على الوفاءنبقى في ألزين والشين.. والله يعلم كل مافي السريره

والفصل الآخر جاك علم الحراكين.. ذي يحشدوا من شان ترجع منيره

ذي جرعوها المر كل الشياطين.. عانت وعانت في الحياه المريره

وألشطر مهما طأل بيصير شطرين.. بالسلم ولا بالبلاء وألذخيره

والحسم يوم الحسم من بعد يومين.. حسب الوعود اتعود زينه نضيره

هذا وانا شوف البلد بين (قوسين) ك لعبة ألشطرنج وايدي تديره

حسب الخطط ذي يرسموها ملبين.. وأللي يخالفهم يطبوا وزيره

هذي سياسات اليهود ألملاعين.. اهل النفوس الحاقده والمكيره

يأالله سالك زلزل السهل والطين.. من تحت اصحاب ألقلوب الشريره

هذأ جوابك وسط باقه بعودين.. العود الازرق والشمطري نثيره

و ختامها خاتم جميع النبيين.. صلوا عليه آلاف جانا بشيره

28/11/2014