ويحضن راسي بصدره يغني لي وهو طربان .. نسيت اللي مضى وياك نهيت أجمل علاقاتي

السلام عليكم ورحمة الله وبركاته

كيفكم جميع

اليوم لقيت قصه وقلت خل احطهآ

وهي للشاعر : [محمد بن مانع القحطاني]

تلاقينا وأنا بلقيا حبيبي مهتني فرحان

أعشم يدي بمصافح يمينه في لقاءاتي

وأكحل عيني بشوفه بعد ما أذكر الرحمن

ويروي بريقه الحالي جروح الحب بشفاتي

ويهمس في وسط اذني رويتك يازهر ذبلان

تدلل واطلب الغالي كثيره لك عطياتي

وأصفف شعره الأسود جدايل أثقلت الأمتان

وأضم كفوفه لخدي وأبللها بدمعاتي

ويحضن راسي بصدره يغني لي وهو طربان

" نسيت اللي مضى وياك نهيت أجمل علاقاتي "

يرددها وبه لوعه يرددها وهو ندمان

تغيّر وقتها لوني ،، تزايد نبض دقاتي

علامك ياقمر ضاجر !! علامك ياقمر زعلان ؟؟

علامك لعنبو همـ(ن) يهمك ماضي وآتي

يناظرني يقول آسف حبيبي أطلب الغفران

على ماقد بدى مني من فعول وخطياتي

عواذل مكنوا مني وساويس وعمل شيطان

بإنك خاين وإني سجينة حسن نياتي

تعرفته وكلمته ومع إنه عذيب لسان

سوى إني تذكرتك وفاضت بي بكاءاتي

صرخت بوجهها ثاير ،، تفجر داخلي بركان :

" صبرت وقلت يمكن يوم أغيّر فيك نظراتي "

ألا ملعون أبو جدك وأبو جدّه وأبو من خان

وأبو من طاعته نفسه على فعل الردياتي

نسيتي يوم ناديتي أحبك يانسل قحطان !!

تقبل جرأة احساسي عشقتك يابعد ذاتي ؟؟

نسيتي من نسى عمره ونصّب حضرتك سلطان !!

يقول السمع والطاعة يقول أمرك يامولاتي ؟؟

نسيتي من جعل شعره كتاب للوفا عنوان !!

قصيدك اسمك وشخصك نجومـ(ن) في كتاباتي ؟؟

نسيتي من إذا جيتي يلم بدافي الأحضان !!

يرحب صوته منادي هلا بك غاية مناتي ؟؟

نسيتي من ليا غبتي يقضي ليلته سهران !!

تموت الفرحه بعينه وشوقه مابعد ماتي ؟؟

نسيتي من عكف ساجد يناجي ربه السلوان !!

ويدعي رد محبوبي يجي يحيي مسراتي ؟؟

طعنتيني ورى ظهري جزى جودي مع الإحسان !!

جزى طيبي ومعروفي تزيدي من عذاباتي ؟؟

قتلني جرحك الوافي غدر بي قلبك الخوان

قتلتيني وأنا ألفظ حروف اسمك بخفقاتي

مشيت الشوك في دربك سراب(ن) يتبعه عطشان
ولاغيره طرف رمشك يحدد لي مساراتي

رضيت القهر في حبك وصنتك ياشبه انسان

حسافه كانت فعولك تخيّب فيك هقواتي

خسارة ماحفظتيها ولا صنتي عظيم أيمان

يمين الصبر في وصلك رغم هجري وزلاتي

كسرتي معاند بشخصي وكسّر موجك الشطآن

ولكن عهد ما أركع ولا ارفع بيض راياتي

وداعيّة أنا راحل ،، إلى الوحدة ،، إلى الأكفان

تغني قولي محمد غدى أول ضحياتي

مصيرك تعشقي غيري وتنسي سالف الأحزان

ينسيك الفرح حزني ياسبة كل معاناتي

قصيدي ترجم دموعي بيوتـ(ن) ضمت القيفان

وسطر قصتي عبره تجلّت في رواياتي

و سلامتكمَ ..