عز القصيد

عَزّ القصيد وزاعلتنـي حروفـه
من يوم غاب الّلي قصيدي مهاويه

غابت به الدنيا وخلّـت طيوفـه
عزّي لمن مثلي زمانـه يعاديـه

عقب الملاقى بس بالقلب أشوفـه
وعقب المناجى بس بالفكر أناجيه

كلامي وشوفي لغيـره حسوفـه
من غيره يْخاوي غريبي وأخاويه

يا لوعة المشتاق تصفـق كفوفـه
لين التفت ما شاف بالدّار غاليـه

كنّ العيون بكل شيـن محْذوفـه
والقلب كنّ جموع الأيام ترميـه

تسابقتني مـن زمانـي سيوفـه
تجرح مْرادي في حياتي وتدميـه

يا عونة الرحمن ويـن النكوفـه
لين انتحى الخفّاق وش عاد يثنيه

ما رحت أدوّر عند خلّي مروفـه
ما يرحم إلاّ الله فلا شـك مغليـه




الشاعر الأمير خالد الفيصل

__________________
[flash1=http://dc09.arabsh.com/i/01710/6kqc4vrlelow.swf]WIDTH=400 HEIGHT=350[/flash1]