من لا مني في الهوى ماهو بحقاني .. ومن لا يعرف الهوى ما أظنه إنساني

هجينية من جديدي .. أتمنى أن تواكب ذائقتكم

آجامل الناس واضحك و أخفي احزاني

وآقول مبسـوط وهمومـي توطانـي

وأطلق حجاجي وفي حلقي من العبـرة

مـرٍّ مريـرٍ خنقـي وألجـم لسانـي

آسرّي الفكر في ليلـه ويسـري بـي

باقـي الليالـي ويامرنـي وينهانـي

يحـرك الذاكـرة ويعيـد ماضيـهـا

يبـي يجـدد عليـه دارس أحـزانـي

وإلا ذكرت الصحيـب اللـي تناسيتـه

قالت همومي ألا يـا كيـف تنسانـي

وتداعت جيوش همي وانتخت باسمـه

وتناولتنـي وهـدت سايـر أركانـي

ما عاد لي في لقاهـا حيـل أو قـوه

ولا اسعفتنـي مخاليبـي ونيبـانـي

يا هم هوّد وعـوّد وارجـع ادراجـك

لا ما نسيتـك ولا بانسـاك بالعانـي

وشلون بانسى همومي والحشا يغلـي

مثل البريق المركـب فـوق نيرانـي

وشلون بانسى همومي والهوى عاصف

صلفٍ هبوبه على حسـي و وجدانـي

وشلون بانسى همومي بعد ما صـارت

وسم على الكبد حطـه سيـد خلانـي

خلٍّ غرامه محيـطٍ مـا هـو بهـادي

إذا نجى فيه مركب مـا نجـى الثانـي

مبطي وحبه بقلبـي تصفـق أمواجـه

ماهو من أمسٍ ولا قبله مـن أزمانـي

ولاهـو بكيفـي تلقيتـه ولا جيـتـه

لا والله إلا هجدنـي عـنـد بيبـانـي

جاني وقلبي غريرٍ فـي الهـوى تـوه

ما به سوى امي وأبوي وبعد ما جاني

ثبت شداده علـى ظهـري وحملنـي

حمـلٍ ثقيـلٍ وعنـانـي وخـلانـي

خلاني أعاني مـن الشـوق والفرقـى

وانثر علـى جرّتـه وزنـي وقيفانـي

آسلـي القلـب بالطـاروق وأتوجـد

واهيم بالشعـر ف شعـابٍ و وديـان

يا وجد قلبي لفقـده كـل مـا مالـت

شمس العصير وتغنى الطير بألحانـي

يا وجد قلبي لو ان الوجد مـا يجـدي

لا رد لي غالـي ولا الوجـد نسانـي

يالله تهون على قلبـي وتلطـف بـي

وتسلي البال عـن مدعـوج الاعيـان

والا فحالي سـواة اللـي تمثـل بـه

فـلاح فـي فقـده لخالـه كحيلانـي

إما رحمنـي قـوي الحيـل والحيلـه

عز الله انه انجزم قلبي مـن أحزانـي

مع اختلاف المصيبـة بينـي وبينـه

لكن وقـع الفـراق أشقـاه وأشقانـي

ومن لامني في الهوى ماهو بحقانـي

ومن لا يعرف الهوى ما اظنه انسـان