منتديات شبكة خورة العربية - مطلوب حرامية وبلطجية

مطلوب حرامية وبلطجية
قامت ثورة تونس بسبب العطالة .. وقامت ثورة مصر أيضا بسبب البطالة .. ومعظم ما يحدث من تظاهرات في العالم العربي أيضا بسبب العطالة .. وانتشرت المظاهرات غربا وشرقا في معظم دول العالم العربي .. حتى سلطنة عمان لم تنجو من المظاهرات مع العلم أنهم دولة خليجية وبترولية كمان المال فيها مليان ويدفق ... وبعد انتشار المظاهرات ... و لمن الحكام العرب شافوا الشغلانية سببها العطالة .. أصبح همهم الشاغل بث التهدئة بين صفوف الشباب بعملية بث تنويم مغناطيسي فسخروا كل الإمكانيات وإعلام الحكومات أصبح منصب لتعين البطالة والخريجين أصحاب المؤهلات الجامعة الشهادات الرنانة .. لكن لم تتحدث أي دولة عربية أو منظمة أو إعلام عن بحث وظائف للحرامية والبلطجية .. أن المجتمعات تتكون من خليط اجتماعي وثقافي وتعلمي مختلط .. فيها حامل الدكتورة وفيها الأمي الغير متعلم ... تتفاوت النسب .. ولا يعتقد الناس بان الحرامية و البلطجية هم فقط من الفئة الغير متعلمة .. هذا يعتبر تقدير خاطئ .. أن البلطجية و الحرامية الحقيقيين حاليا في العالم اجمع .. هم من قمة المجتمع المتعلم ... فهل عمرك سمعتم بان هنالك حرامي سرق مبلغ يفوق المليون دولار وكان غير متعلم .. أو عمركم سمعتم بشخص لا يفك الخط زي ما يقولوا أهلنا الكبار .. يعني ماسح بلاطة بس .. واستلم منصب كبير وهبش هبشة بت كلب من شعبه وهرب .. بكل تأكيد نحن في زمن حرامية وبلطجية متعلمين ومثقفين كمان أن عجبكم .. والثقافة خشم بيوت .. حرامي مثقف ثقافة أوربية تلاقيه كل سرقاته تمشي باليورو وتحول إلي أرصدة إلي أوربا فقط .. وحرامي تربية أسيوية .. تلاقي كل الأموال التي يلطشها تمشي بالروبية الهندية ( رفيق ) أو بالعملة الماليزية .. كل حرامي يا ناس وثقافته .. انتهى زمن ألحرامي بتاع سلك الغسيل .. وانتهي زمن ألحرامي "البتلب" الحيطة .. لأنه البيوت الممكن ينطو فيها ذاتها بقت فاضيه ما فيها التكتحة .. المحيرني .. كل من يستلم منصب في لعالم العربي في لحظة استلامه للمنصب وحلفان اليمن تقول الزول دا بس يااا هو " ابوهريرة " او تقول دا بس صحابي جليل جانا من اجل ينجدنا وينقذنا من سرقات الحرامية .. فجأة شوية شوية تلاقيه بقى شيخ منصب .. شوية شوية تكتشف انه القبة ما تحتها " فكي " .. يطلع تحتها حرامي ليهو ضل .. اها تجيك الأنباء عنه بعد الانتفاضات .. وتسمع عنه كلام عجيب وغريب لو من شيطان او إبليس عديل ما تصدر تصرفات زي ألعملها في شعبه .. قلنا يا ناس نختصر الكلام ألفاضي دا .. ومن اليوم أنا حالف من أدي صوتي في أي انتخابات أو حتى في ترشيح أي زول .. الا اذا عرفت انه حرامي وبلطجي رقم واحد .. ويعترف لينا .. عشان شنو يا ناس عارفين .. عشان ظني ما يخيب فيه بعدين .. أكون عارف من أولها انه زولي حرامي .. وأنا متيقن وما مخدوع .. فمن يأنس في نفسه الكفاءة بانه بلطجي ونصاب فليتقدم و الله الوظائف للفئة دي في العالم العربي ملياااانة تب .. النصيحة أخير منها مافي يا ناس .. ما نتعب نفسنا ونتور نفسنا ساي هاتوا لينا حرامية عدددديل .. عليكم أمان الله الزول البقول هو حرامي و عايز يترشح لينا والله دا اصدق زول وأحسن منه ما تلاقوا حرامي أو بلطجي .. أحسن ليكم من الكضاب .. هنالك حديث يفيد بان المسلم لا يكذب أخير لينا البقول حرامي من البعمل لينا فيها ستة بقرشنص في الدين وهو حرامي ابن ستين حرامي .. بالله لحظة حلفان اليمين التقول بضرب في كتاب جغرافية ولا مجلة ميكي ماوس الله يشل يد كل حرامي قولوا معاي آآآميييين

منقووول